He he yaa! Story come to bump!
Teacha put di whole a we inna one group
And none cyaa help none out
Shi say shi haffi use dis yaa approach yaa
Suh shi can re-teach and reinforce
Accelerate di bright one dem
But once di sense
When water always teck di same course
Di fast one dem get all the attention
All we face a discrimination, humiliation
And stigmatization
Sometimes mi haffi wonda if dis a retribution.
And teacha clueless, shi live inna illusion
Cause from mi born, mi know each one, teach one
You know waa mi a talk bout di great inclusion
But wi a gwaan hol it eno
Wi haffi stay strong
Cause dem label wi
Call wi di dunce clan
But wi nuh dunce eno
Wi jus need a helping han
Give wi a crutch
Help wi along
And u woulda see how wi tun up
Matriculation
Step out inna gown, inna graduation
But we tiad a it
Frustration
Dis ya academic demarkation
We need a voice
We need a radio station
If you feel mi pain
Link ministry of Education
Tell dem dis a modern day plantation
Blind a lead, there is no vision
We nah retreat, no compromision
We need help now!
We need a decision
Dis a my message
Convey it with compromision!
Written by:
Jodyann Hutchinson-Bernard