Piny ombachni wuod otong’ nam. Meda chang’aa matin apimni mbakani. Min Oyundi, med patila ka! Ngima chuok, wuod owaga, we acham lweti kawuono. Chieng’ moro wawuok wadhi e thum. Ne pod watindo to rembwa liet. Piny oselil to wakaso siandawa ni ngolo nyaka wamiel. Wawuok e dala. Koth chwe ka saitan to waketore ni wuoth ka osechakore onge duogo chien. Wadhi to koth gowa. Wadhi to koth gowa. Wadhi to koth gowa. Omera koth nogowa ka niang’. Ogowa alanda. Wachopo thum ka dendwa ng’ich ka um guok. Wayudo ka mine oumore gi leso, nindo e par mopedh e agola. Jodongo toluoro magenga oyo mach to bulo tie rombe. To oseke ok wuog e dhogi. Nitie disco ka. Omega one. Spike muocho polo piach. Nyiri ndeso ndes Kisumo. En dala maduong’. Wapenjo dayo ni ng’ama yamo olalo. Onyisowa ni wuoyi siro, Brian Muga Soja, wuoyi achiel kende, wuoyi ma ong’eyo ii min, Brian jasiport, ema onindo. Ywak ne lich dalano Omera, chalo mana gi ywak mane waywago Jaramogi. Karango koni gi koni to aneno nyako moro ka miel e taya. Orao kona ni aluonge. Ok awuok, an Orony wuoyi ma silwal, wuoyi ma dhoge wembe. Thum to otuore ka dundu e aora. Dunia Mbaya lich, Princess Jully nego dendwa ka. Nungo winyre to yawuoyi kuoto chang’aa ka pi. Nyasore kende oumo dala polo rachar chalo ang’weng’o. Adhi e taya kama miel otime cathedral mondo aluong nyako ma orwako skirt machiek gi tumbo cut. Mit aluongo nyakono to tamore atama, dakika moro matin to obiro. Mano ne pok aneno wang’e maber. Omera we anyisi wachni kawuono. Nyako mararacha ohero kisera. Oketa e mudho gi miel to kata ng’amane luonge ema pok atere. Nyauyoma no puonja ni kama itiye ema ichieme. Jagam mayi nyako kata obed osiepni ma ngita gi del. Rach to orach ayie, ok atamra, lakini kaka owinyo nungo Omera kata in ok inyal weye. Apenje ni wadhi kose ok wadhi to wang’e mil ka paka e mudho. Rabuon ema obang’o ka aidha. Rabuon ibang’o otieno yawa? Fred kawuono adiwo, ayudo nyako mararacha to kia mbaka. Pinyni agonda Omera, kata bim kia ni piere kwar. An aol kode. Adok to angiso orao ni nyakono wiye ng’ich ka chumb otanda. Otoyo ok yie koda. Owachona ni aketora ni an wuoyi ma silwal, wuoyi ma dhoge wembe to sero nyako otama. Angise ni nyakono raracha ma yie ema ok oyie ayieya. Ema mudho ka to ema yawuoyi jis marach. To wan be ndalogo ne waketore ni wan e wan. Ne onge ng’ama nyalo tugo kodwa. Nyingwa ne en tulo to tulo ne en nyingwa. Opanga’ ne ok wuog e kabuti. Chieng’no ne waromogo wuod ma. Rabondo wacho ni oliele to kata gima ilielo onge. Chieng’no ne wang’eyo ni liedo en ang’o. Wayudo Jaduong’ matar ka aguch abagi kawero ‘Obiero Jalego’ e agola. Mano nyatiti machon mar Ogwang’ Lelo. Isewinjo nyatitino? Ogwang’ Lelo wero kaka Obiero Jalego ne obiro nyorobi. Obiero jathum owuok Ukwala biro nyorobi, otiko to siling apari gariyo kende. Ndalogo kata nyamburko ne onge. Jopango ne iidho gari mowuok Uganda. Mano e kaka piny oselokore. Ndalogo nepodi ok onyuoli. Jarachar ne podi pielo e wiwa. Kidwa ng’eyo luo kitgi gi timbegi to winj nyatiti wuod ma. Winj Oguta Lie Bobo komako onanda to dendo wer. Jaduong’ oketo chupa chang’aa e atonga moro matin e bathe. Atonga jaduong’ ok bed nono. Odino wii chupa fanta gi ogusu. Orao lung’ore to ywayo chupa. Wayuomo chang’aa. Kara wakia ni wang’wenyo pier pino. Jaduong’ maneno ka ng’ama olalni kara e wuon dala. Omera meda kong’o atiekni mbakani. Ka pok walung’o kata kong’ono, to waneno ka yawuoyi luorowa. Anyiso Orao ni weche tek ka. Ging’eny makata sword ok inyal golo. Bul ok go gi lwedo achiel. Wan ji ariyo to jogi piny ngima, Orao nyisa. To aduoke ni, obwolo kotwi ok dog e lowo. Omera ne wawuok dalano aputh njiri! Yawuoyi goyo nduru e tokwa gi tonge maboyo ka Lwanda Magere. Yo rach to tho ok rit. Waringo ka mwanda miriembo gi jodwar. Piny olil to kuthe tucho tiendewa ka kuth tworo Kibos. Ayuago mana mama, lit ma adhi ketee NyaUyoma. NyaUyoma miyo matek orito dalane gi lwedo ariyo. Kawuono ero wuodi Fereda inego e thim ka aidha nikech chupa chang’aa. Omera ne waringo. Waringo. Waringo. Majang’o uweyo kando. Ne waringo. Jogo ne oketowa gi ng’wech ma pok na neno ngimana tetete. To ne ging’eny. Omera ne giriembowa ka giyuak ka guogi e tokwa. Chieng’no emane ang’eye ni onge kama tielo ok kal. Tho koliero e wiyi, kata mach ikalee gi siandani nono. Anyiso Orao ni sani ok wanyal kalo god dudi. Jogo nyalo makowa. Orao ngisa ni nitie yo machuok makalo e aora path kor gi shem rateng’. Wagoyo chiel to wadhi. Wachopo e wi got malo ka joas, chunywa chako duogo. Kawuono wanyono wii thuol thura, anyiso Orao. Wachiegni chopo bath dala, to bungu moro waneno ka luorowa. Magi masira mage kendo Nyakwar Orony? Bungu wuok kanye e buodho mane adoyo kendani? Yawa jothurwa! Kaka amedo dhier e kaka bungu umowa gi mudho. Luoro nega. Awinjo ka denda tho kalandhidhi. Ma masira mane. Orao osiepa to piere rego mogo ma okia ni otim nang’o? Jajuok kawuono negowa mana e bath dala. Hawi maber bungu lal. En ang’o matimre ka Fred, Orao penjo. Okanene! Ka pok aduoke mbi mar Jajuok oumowa. Mbi ogoya matek ma wapodho e yien mapera manewatenore. Omera siandawa ne liet ka pas. Wadiewo e longe ka nyithindo mochamo maembe dodo manum. Kawuono jalni negowa manuar. Piny kende mudho ma ti. Meda kong’o Kawuono apimni wachni maber. Pok ineno dhako majajuok apiti piti? Omera dhakono ne duong’. Ochung’ mbelewa. Tiende rom gi kor maembe. Wiye kende chalo yago, to dinge okuot ka ding ongwang ma kich okayo e mapera. Siandane to othichore. Kang’iye tochalona mana nyako mane otamo wang’a e thum. Tobedo maduong’ nade? An Fred wuod NyaUyoma, wuoyi ma silwal, wuoyi ma dhoge wembe, yawa, kawuono kisera otera mana e Jajuok? Omako lwetewa. Wachalo nyithindo matindo e nyime. To opielowa e chuodho. Omera mon nitie pinyni ma jomahundu. Dhakono ne ong’adowa boka rao seriously. Heheheee kata NyaUyoma minwa ne ok ochwada kamano kane atin. Osogo yuak piny ru to wanindo gi iiwa e chwodho. Dendwa lit nyaka chogo. Boka ong’adowa nyowuoyo nikech manyo Patco e thum. Wiya ok nowil gi masirano.