The Complaint of Chaucer to his Purse

Geoffrey Chaucer

 Next Poem          

To yow, my purse, and to noon other wight
Complayne I, for ye be my lady dere!
I am so sory, now that ye been lyght;
For certes, but ye make me hevy chere,
Me were as leef be layd upon my bere;
For which unto your mercy thus I crye:
Beth hevy ageyn, or elles mot I dye!

Now voucheth sauf this day, or yt be nyght,
That I of yow the blisful soun may here,
Or see your colour lyk the sonne bryght,
That of yelownesse hadde never pere.
Ye be my lyf, ye be myn hertes stere,
Quene of comfort and of good companye:
Beth hevy ageyn, or elles moote I dye!

Now purse, that ben to me my lyves lyght
And saveour, as doun in this world here,
Out of this toune helpe me thurgh your myght,
Syn that ye wole nat ben my tresorere;
For I am shave as nye as any frere.
But yet I pray unto your curtesye:
Beth hevy agen, or elles moote I dye!

Lenvoy de Chaucer
O conquerour of Brutes Albyon,
Which that by lyne and free eleccion
Been verray kyng, this song to yow I sende;
And ye, that mowen alle oure harmes amende,
Have mynde upon my supplicacion!

Next Poem 

 Back to Geoffrey Chaucer
Get a free collection of Classic Poetry and subscribe to My Poetic Side ↓

Receive the ebook in seconds 50 poems from 50 different authors Weekly news

To be able to leave a comment here you must be registered. Log in or Sign up.