Scotland

William Soutar

 Next Poem          

Atween the world o' licht
And the world that is to be
A man wi' unco sicht
Sees whaur he canna see:

Gangs whaur he canna walk:
Recks whaur he canna read:
Hauds what he canna tak:
Mells wi' the unborn dead.

Atween the world o' licht
And the world that is to be
A man wi' unco sicht
Monie a saul maun see:

Sauls that are stark and nesh:
Sauls that wud dree the day:
Sauls that are fain for flesh
But canna win the wey.

Hae ye the unco sicht
That sees atween and atween
This world that lowes in licht:
Yon world that hasna been?

It is owre late for fear,
Owre early for disclaim;
Whan ye come hameless here
And ken ye are at hame.

Next Poem 

 Back to William Soutar

To be able to leave a comment here you must be registered. Log in or Sign up.