The Shorter Catechism

John Buchan

 Next Poem          

When I was young and herdit sheep
I read auld tales o' Wallace wight;
My held was fou o' sangs and threip
O' folk that feared nae mortal might.
But noo I'm auld, and weel I ken
We're made alike o' gowd and mire;
There's saft bits in the stievest men,
The bairnliest's got a spunk o' fire.
Sae hearken to me, lads,
It's truth that I tell:
There's nae man a' courage--
I ken by mysel'.
I've been an elder forty year:
I've tried to keep the narrow way:
I've walked afore the Lord in fear:
I've never missed the kirk a day.
I've read the Bible in and oot,
(I ken the feck o't clean by hert).
But, still and on, I sair misdoot
I'm better noo than at the stert.
Sae hearken to me, lads,
It's truth I maintain:
Man's works are but rags, for
I ken by my ain.
I hae a name for decent trade:
I'll wager a' the countryside
Wad sweer nae trustier man was made,
The ford to soom, the bent to bide.
But when it comes to coupin' horse,
I'm just like a' that e'er was born;
I fling my heels and tak' my course;
I'd sell the minister the morn.
Sae hearken to me, lads,
It's truth that I tell:
There's nae man deid honest--
I ken by mysel'.

Next Poem 

 Back to John Buchan
Get a free collection of Classic Poetry ↓

Receive the ebook in seconds 50 poems from 50 different authors


To be able to leave a comment here you must be registered. Log in or Sign up.